Khawpui hulum lai a chen te tan chuan motor tlan ri leh khawl hrang² thawm ri emaw mihring duham na tinreng midang te aia nei hnem bik tumna thawm ri bak hriat tur a awm lo. Kan chen velna bawlhhlawh chhek khawl nen, mihring hmasawn na intlan siakna kawngah hian, khuarêl thil te chu kan duh ang² kan cheibawl a leilung mawina thlir thiam turin hun in min daih lo a ni ber mai.
He hla phuahtu hian khuarêl a thlir dan chu a danglam a, siamtu kutchhuak mawina hla thu ril leh a thluk mawi em em hmang a, a rawn phuah chhuak hi ava ropui em!! He hla hi amah Buta mai bakah mizo zaithiam dang Vanlalruati, Daduhi, Pantei etc ten an sa nual hlawm a, an âw a mawiin ngaithlak a nuam hlawm viau mai, amaherawh chu a original ber ti ila Lalbuta Daifim sak ngei mai hian he hla anih dan tur ang takin a sa chhuak bik in ka hre ve țhin.
"Tlang tin mual tin thing tin zar belin,
Va tinreng kawp lai di nen,
Lenlai ni chen lungrual ten an leng siau e.
Zobawm dingdi tlangsampar sirsiar,
Lentu chhawl hnawng ram daiah;
Hlim sa leng rual ten hlimin sam an chai e.
“An leng e, hlimlai chen in,
An ngai lo'ng tleidang par he lei chinah;
Ka nuam e an ianga,
Hmatiang dawn ngai lo nun nuam;
Aw..awm ve ngai maw hringnun.”
Vau, tuahpui leh thingtin par zawng te,
Vul lai rel an kur siauve;
Romei zam chiai zing riai nen thal an mawi e."
Phat rual a awm lova, mihring hi kan lo piang chhuak tawh anih chuan hringnun ah hmasawnna leh nitin khawsak ngaihtuah in hun kan hman a țul a, chu chuan kan rilru leh thinlung, kan ngaihtuahna te hi a thunun vek avangin, beisei leh lungkham chu kan neih vek si a. Sava leh ramsa dang te anga hma lam hun lungkham buai ngai lova, hmatiang dâwn ngai lo hringnun neih chu a awhawm in, mihring te tan chuan khawvel a thil thlakhleh awm ber ani hial reng a ni.
