He hla HD. Lalthanpari phuah amah ngeiin a sak lar hi rual u deuhte leh tun hma a Radio AIR Aizawl vel a Pathian fakna hlathlan ngaithla ṭhin te chuan an hre lar fu in a rinawm. Pu Darphuta leh Pi Huanmawii te fa pakaw zinga pathumna niin N.Khawlek ah a seilian a, he hla hi kum 1987 bawr vel a phuah a ni. He a hla aṭang hian a phuahtu testimony ropui tak mai kan hmu a, hla thu har leh sawifiah ngai engmah a awm hran lova. Chang khatna leh chang thumna ah Pathian hnena a thil dil chu mihring duh dan lo ang zela chhanin a awm thu a puang chhuak a. Chang hnih leh chang linaah thung chuan; tisa lam dan a thil tha lo a tawh te chu, Pathian lama malsawmna hnar a nih zawk thu puangin chang fel takin a rem a ni.
Ni e, a chang chuan Pathian remruat dan hi a mak a, mihring tana hriatthiam har em em thil tam tak kan chungah hian a thleng fo ṭhin a. Ringtuten kan chunga harsatna, manganna, buaina leh hrehawmna te, a bik takin Thihna hial kan tawh changte hian hriatthiam har kan ti a, Pathian rem ruat danah kan lungawi thei lo fo ṭhin. Amaherawhchu, Pathian hian “A duh dan ang leh kan tan a tha tur zawkin ro min rel sak thin,” tih erawh kan hriat nawn a ṭul hle mai. Sam ziaktu chuan “Pathianin ami hriatchianna chu atan a mak lutuk a sâng êm a, ka phak lo a ni,” a lo ti a, Pathian hian a thil siam keini mihring te awmdan hi min hrechiang em em tih hi phat rual a awm lova. Chuvangin, Amah ngei chuan kan tan a ṭha tur engkim a hria a, ‘kan nuna a thil tum leh ruat lawk te chu kan tan a ṭha’ tih hi hringnun atanga hriatfiah zawh theih nilo mahse thlarau atangin min hrilhfiah zawk ṭhin a lo ni.
Tin, kan mimal nun, kan chhungkua, kan khawtlang leh a ram ang pawh a vanduaina leh buaina kan hmachhawn changte hian, Kristian kan nih angin chunglam kan au fo ṭhin ngei a, mahse kan beisei ang chhanna erawh kan hmu vek kher lo ang. Chutah chuan zawhna alo piang ṭhin. Eng nga tinge hetiang hi ka chungah a thlen? Tinge kan chhungkuain heng harsatna te hi kan tawh bik le? Tinge ka nu/pa, pi/pu ten cancer natna an vei bik a.Tinge nasa taka ka beih ve hnuah pawh ka vanduai bik tlat ṭhin? Misual tak tak leh thih phu zawk ngawih ngawih an awm lai a, kan tan a mi ṭha leh kan mi thlakhlelh ngawih ngawih ten mual an liam zel si? Heng zawhna zawng zawngte mihring chuan kan hrethiam vek dawn lova, chhanna pawh kan hmuhdan a inang vek dawn lo; Amaherawhchu, Pathian hian min koh harh a duhna avangin kan chungah harsatna a thlen tir ṭhin tih kan hriat a ṭul a. A Lal ram din nan a fapa meuh pawh hlantu, kan Pathian hian ama ropuina atan chuan kan tawrh ve pawh hi a phal tih hi kan pawm thiam a ngai a ni. Amah kan hriatphahna atan lek phei chuan ‘kan mimal leh chhungkua ah te hian natna khirhkhan tak min pe hreh hauh lo’ tih hi harsa mahse kan pawm thiam a ngai takzet a ni.
Sam 119 ah chuan “Tihhreawma ka awm hma khan ka vâk bo thin a; Tunah erawh chuan i thu ka zawm ta. I thuruatte chu ka zir theih nan, Tihhreawma ka lo awm kha ka tan a tha a ni”, tia a lo sawi ang khan. Hrehawmna hmun a kan awm phawt loh chuan, Lal Isua tawrhna leh kan tana a inpekna te kan hrethiam pha lova, bawrhsawma kan awm ve hma loh chuan Pathian kan ngaihna a nep fova, hmuhsit leh mualpho a kan awm ve phawt loh chuan Lal Isua tlawmlai hmel hi hmuh fiah tak tak a har tawh thin.
Pathian in min hmangaih a, mahse min hmangaihna avang hian kan duh dan ang vek erawh chuan kan nun min hman tir hi a tum hran lo. Tirhkoh Paula pawh khan a taksaah natna eng emaw (hling) a neih thu leh chumi lak kian sak tur chuan Pathian hnen ah vawithum lai a dil nghe nghe a nih kha (II Korinth 12:7-8), mahse Pathian chhanna erawh chu “Ka khawngaihna i tan a tawk e; ka thiltihtheihna hi chak lonaah asin tih famkimin a awm ni,” tih a ni daih thung. Kan sual vang ni lo pawhin Pathian hian a ropuina tarlan a duh avang zawkin a hmanruaah min hmang thei a, natna te hi min lo pe reng thin alo ni zawk a. Kan chak lo a ni tih ka inhriat chauh hian a ni , Lalpa chakna hi chhawr nachang kan hriat chauh thin ni.
Sam 84:6 “Tahna ruam chu an zawhin tuihna awmnate an siam thin a, A ni, ruahtui tla hmasa chuan malsawmnain a khuh thin”.
Mittui hul tur chuan mittui tlak hmasak angai thin ang hian hringnun hi tahna ruam zawh a, lãwmna tuihna thar tawng tur a ni. Chuvangin kan tawngtai a, chhanna kan duh ang alo thlen hma hian Tahna ruam kan zawh hmasak tul thin a, chumi zawh ah chuan lawmna tui hna thar chu siamin a awm dawn chauh zawk a lo ni.
“Ka dil loh zawk malsawmna ka chungah Lalpan min vur a,
Ka tan a tha tur zawk in ro min rel sak
Chatuan nunkawng zawhna ngei chu,
Malsawmna hlu chatuan malsawmna”
No comments:
Post a Comment