Isua Krista leh Chhandamna

“Keimah hi kawng leh thutak leh nunna ka ni; keimaha kal lo chu tumah Pa hnenah an thleng ngai lo".(Johana 14:6)

Ringtute zingah hi chuan min chhandamtu ah Isua Krista hi kan pawm lo kan awm kher lovang, nimahse ringtu ṭheuh ṭheuh ah pawh chhandamna kan pawm dan hi alo inang lo thei hle, ṭhenkhat zirtirnaah chuan Isua Krista a tâka he khawvela a rawn thih hnu 'Thutlung Thar' ami te leh Isua rawn kal hma 'Thuthlung Hlui' hun ami te tan hian chhandamna hi inang lovin, a hun hran ṭheuhah Pathianin chhandam hi a ruatsak nia zirtirnate a awm ṭhin. Nova hunlai khan lawng tukin chhandam an ni a, Abraham hunah serh tan hmangin chhandam an ni leh a, Mosia hunah Pathian dan zawm avangin chhandam anni leh a, tia zirtirna te a awm ṭhin a. Israel fate khan Pathian dan kha zawm thei se chu, Krista hi a thih angai lo tur tia sawi te pawh a awm ṭhin.

Galatia 2:21 ah chuan Tirhkoh Paula'n "Dan avanga felna a awm si chuan Krista chu athlawnin a thi a ni ang asin", tiin a lo sawi a. Tin, Rom 3:20 ah "Dan thiltih avangin mi tumah a mit hmuhin thiam changin an awm lovang", tih te leh Galatia 2:16 ah "Dan thiltih avanga thiam changin an awm lova, Isua Krista rin avang chauhin thiam changin", an awm tih a lo sawi a. Tin, Galatia 3:11 ah "Mifel chu rinna in a nung ang", tih kan hmu leh bawk.

Nova hunlai ah kal ta ila Hebrai 11:7 ah chuan, “Rinnain Nova chu thil lo la lang lote kawng thu-ah Pathian hrilha lo awmin, Pathian tih dekin, a chhungte chhandam nan lawng a tu a”, tih kan hmu a, a landan ah khi chuan lawng tuk hmanga chhandam chu a ang ngei mai, mahse a chang tawp lam kan chhiar zawm zel chuan.... “chu chuanin khawvel chu thiam loh a chantir ta a, rinna avanga felna awm chu rochungtu a lo ni bawk a”, tih kan hmu leh zui a, Nova thiam channa hi a rinna avanga chauha mi fel a ngaih anih zawk thu chiang takin kan hmu. Tin, tuilet zawh hnu lawng aṭanga an chhuah hnu khan Nova leh a chhungten an tih hmasak chu Lalpa tan halral thilhlan an hlan a ni. Ran thisen hmanga inthawina reng reng hian nakîna Lal Isua kraws a la rawn thi tur chu a lo entir a, beram no Lal Isua thisen ngei chu Nova tan chhandamna a ni a, chumi an rinna avang chuan Pathian in mifel ah a ruat ta a ni.

Abrahama hunah kal ta ila, Rom 4:9-11 ah chuan.. “ 'Abrahama rinna chu a felnaa ruat a ni' kan ti si a. Chu chu eng tia ruat nge ni le? A serh tan hnuah nge, a serh tan hmain? A serh tan hnuin a ni lo va, a serh tan hmain a ni zawk”, tih kan hmu a. Hei hi chiang takin serh tan vangin chhandamin a awm lova, Pathian a rinna avang zawkin Abrahama hi mifel a ruat a lo ni ve leh tih ka hretiam thei ang.

Tin, Lal Isua khan Johana 8:56 ah, “In thlahtu Abrahama kha, ka ni hmu tur a nih avangin a hlim em em ṭhin, tin, a hmu ngei a, a lawm hle a,” tiin a lo sawi a, Isuan 'ka ni' atih hi eng nge ni ang? Pathianin Abrahama hnenah a fapa Isaka halral thilhlan atân hlan tura a tih khan "Abrahama hian Pathian a ring a, mithi tawh pawh a kai tho leh thei ang tih a ring a" tiin kan hmu, nimahse mahni fa te tihhlum chu thil awlsam a ni lovang. A rilru a hrehawm hle ngei anga, hei hian khawvel sual tlan tura a fapa Isua Krista rawn tawrhna tur atana Pa rilru natna a hriatthiam tir a, chu ngei chu Lal Isua'n 'ka ni' a tih chu a lo ni a. Abrahama thiam channa pawh Lal Isua Krista chauh a ni tih kan hrethiam leh ta.

Thuthlung Hlui hunlai chuan an sual ngaihdam nan Pathianin ran thisen hmanga inthawi dan a zirtir a, sual man chu thihna a ni si a, nimahse misual te chu Pathianin a hmangaih a, a khawngaih bawk si a. Pathian thupek awm tawh anih avangin thi kha awm ngei angai bawk si, tichuan an aiah ran thisen chu an sual ngaihdam nan alo pawm sak ta a. Nimahsela, a hunlai zelah Pathian 'chutiang chuan ti ula, in sual ngaihdam a ni ang' tia a sawi chu an pawm a, an ring a, chu an rinna ngei chu Pathianin an sual ngaihdamna atan alo pawm sak ta a. Thuthlung Hlui a inthawi nan a ran thisen luang ta zawng zawngte kha an mahni chhandamtu a ni lova, chhandamtu tak tak zawk chu Lal Isua Krista kha a ni a, nimahse tâka khawvela ala rawn pian si loh avangin a aiawh ran thisen hmangin Lal Isua an rinna chu an lantir mai zawk a lo ni.

Mosia chanchinah lut leh ta ila, Hebrai 11:24-26 ah khan, "Rinnain, Mosia chuan a lo puitlin hnu khan Pharaoa fanua fapaa vuah a duh lova; rei lo te atan sual nawmna hlimpui ai chuan Pathian mite nena tihduhdah tuar a thlang ta zawk a; Krista an hmuhsitna chu Aigupta ram rote ai chuan sum ropui zawkah a ruat a; lawmman pek tur chu a thlir ṭhin avangin", tih kan hmu a, Mosia hian nakina atana Krista la rawn thi tur chu rinna in alo hmu lawk tawh a, chu a rinna chu Aigupta ram rote ai chuan sum ropui zawkah a ruat a, chu ngei chu Mosia thiamchanna, mifel a ruat anih na chu a ni. Tin, Isaia 53:5 ah chuan "Nimahsela ani chu kan bawtchhiatnate avangin hliamin a awm a, kan khawlohnate avangin vuak thitlinin a awm a; kan thlamuanna tur thununna chu a chungah a tla a;a vuakna vualtea tihdamin kan awm ta", tiin a lo sawi a, Isaia bung 53 thu kan chhiar hian Lal Isua chanchin a sawi a ni tih hi tutan pawh hriatthiam theih tur khawp a chiang a ni a, Isaia pawh hian a damna chu Krista chauh anih zia chiang takin a lo hmu vek tawh a ni.

Tirhkoh Peteran ti hian a lo sawi a "In thlahtute pek chhawn, in awm dan engkhaw ni lawilo lak ata chu, thil chhe thei, tangka leh rangkachaka tlan in ni lo va, beram no hmelhem lo leh bawlhhlawh kai lo thisen anga Krista thisen hlu chuan tlan in ni zawk tih in hre si a; ani chu leilung pian hmain ruat lawkin a awm ngei mai",(I Petera 1:18-20) Lal Isua kraws a kan sual tlan tura a rawn thih tur thu hi leilung pian hma daih atanga ruat lawk a ni a, chu ngei chu chhandamna kawng awmchhun khawvel mihring zawng zawng tana Pathian ruatsak chu a ni.

Dan zawm leh thiltih ṭhat avanga thiam chang kan nih chuan, Lal Isua vang a ni tawh lovang anga. Serh tan vanga thiam chang kan nih chuan Lal Isua vang a ni tawh lo ang. Thlahtu bul Evi leh Adama aṭanga mihring sualna chu dan zawm emaw, thiltih ṭhat emaw serh tan avangte in thiam chang reng reng an awm thei lo.

Tirhkoh Paula'n Timothe-a hnen a lehkhathawn (II Timothea 1:9) ah chuan “Ani chuan kan thiltih angte ni lovin, ama ruat leh khawngaihna ang zawkin min chhandam a, kohna thianghlimin min ko bawk a; chu khawngaihna chu leilung pian hmain Krista Isuaah chuan min pek a ni tawh”, tiin chiang takin alo sawi ve bawk.

Tin, mi ṭhenkhat chuan Thuthlung Hlui Pathian chu Pathian ti kher kher, Pathian strict a ni a, Thuthlung Thar Pathian erawh Khawngaihna Pathian, Pathian zaidam bik ang ten ngaihdan an nei ṭhin. Pathian hian a tâka Isua Krista'n kraws a min rawn thihsak hnu (Thuthlung Thar) hunah hian min rawn khawngaih thar ta thut a ni reng reng lova. Leilung piantirh ata khawvel tawp thleng pawhin Pathian chhandamna hi "rinna avanga chauh a khawngaihna a chhandam" a ni kumkhua dawn a, chumi chhandamna kan sual zawng zawng min tlenfai saktu ngei chu Lal Isua thisen hlu chauh chu a lo ni zawk a.

Thuthlung Hlui ami te chuan rinnain "nakinah Lal Isua ka tan ala rawn thi dawn a ni", tiin a aiawh ran thisen hmanga inthawiin hma lam hun an thlir a, keini Thuthlung Thar hun ami te erawh chuan "Lal Isuan ka tan kraws ah a thi a, ka tan tho leh a ni", tiin hun kal tawh kan thlir thung a, chumi kan rinna lantirnan chuan Baptisma leh Lalpa zanriah sakramen hmangin kan entir ṭhin a ni a. Tichuan, Thuthlung Hlui ami te leh Thuthlung Thar ami hi Kraws ah kan intawk khawm vek a, Krista ngei chu tu te tan pawh kawng leh thutak leh nunna, Pa hnen kan thlen theihna awmchhun chu a lo ni.

Hei ngei hi a ni Petera'n (Tirhkohte 4:12) “Mi dang tuma hnenah chhandamna a awm lo; van hnuaia mihring sak zingah, min chhandam tur hming dang reng a awm lo,” tia alo sawi chu.