Bible a Israelte Lal ropui tak Solomona vânglai khan, khawvel a Lal dang zawng zawng te chu hausak leh finna ah a khum vek thu kan hmu a, kum thum dan zel ah rangkachak te, tangkarua te, saingho, ar-awn leh zawng te, tuikeplung te leh algum thing danglam bik tak te chu Tarsis lawng rual hmangin, a Lalram ah a chhêk lut ṭhin tih kan hmu bawk. (1 Lalte 10:22)
Solomona kha a fînna leh hausakna avang khan khawvel lal tam takin amah belchiang tur leh Pathian in a pek finna te belchiang tur khan an pan huai huai ṭhin thu ka hmu tel bawk a (Seba lalnu ang te); chutah chuan lawmman atan thil pek tam tak a dawn belh nasat thu kan hmu bawk. Hetih rual hian a ropuina leh a hausak tehna ber pakhat rangkachak a ngah em em na kha, Ophir tih hmun aṭanga a lakluh nasat êm vang ani a tih theih (2Chronicle 9:10/1 Lalte 9:28). Ophir rangkachak chungchang hi Bible ah Chronicles, Lalte, Joba, Sam leh Isaia ah te ziah lan a ni a. Tûra Lal Hurama I leh Solomona khan an chhiahhlawhte chu Ophir hmun ah lawng hmangin rangkachak phur tur an tir ṭhin a, a kum bî in rangkachak leh thil hlu chi hrang hrang Solomona khan a dawng ṭeuh ṭhin a ni.
Ophir hi eng hmun chiah nge anih a, hetiang tak a rangkachak leh lunghlu te bakah 'algum thing' a hunlai a Judai ram a la lut ngai loh leh anla hmuh ngai loh, a ram aṭanga pawh a lakchhuah ni leh ta miah lo khawp a 'thing' hlu bik te hi, he Ophir hmun ami hi a ni si a?
1 Chronicles : 1 ah khan Joktana fapa te ho zinga pathum Sheba, Ophir leh Havilah te kan hmu a, heng a fapa pathum te hian thawnthu kal zel an nei a, Bible ah hmu chiah tawh lo mahila Arabic thawnthu hlui Kitab al-Magall ah chuan Joktana nau Pelega fapa (Genesis 11:18) Reuva hunlai khan Sheba lal a hming "Pharoah" chuan Ophir leh Havilah ram te chu a ram ah a chhuh lui a, Ophir ram tlangpang leh lung awm zawng zawng te chu rangkachak vek anih thu a tarlan ani a, rangkachak khawpui a din ani. Syria ho thawnthu 'Cave of Treasure' tih ah leh "Conflict of Adam and Eve with Satan" tih Ethiopia ho thawnthu aṭang te in Ophir hmun a lung awm zawng zawng te chu rangkachak hlang (pure gold) vek annih thu tarlang a ni ve bawk.
Tin, kum 1946 khan Tell Qasile tun a Tel Aviv (Israel) ni ta ah khuan kum zabi pariatna hunlai vel a thil inziak an lai chhuak hlauh a, chutah chuan Hebrai ṭawngin Ophir hmun leh rangkachak in thawnna kual dan chungchang te ziah lanna chu hmuh chhuah a ni ta bawk, mahse Ophir hi khawi hmun ah nge a awm chiah tih hi tun thlengin tuman an la hrechhuak zo lo a ni.
Archaeologist te leh Bible zirmi scholar te chuan Ophir awmna dik tak zawn chhuah tumin ngaihdan leh rilru pawh an seng nasa tawh a. Tuifinriat a sea route hmuchhuaktu Vasco da Gamma hnungzuitu Tomè Lópes chuan Africa ram a Great Zimbabwe vel chu Ophir hmun anih thu a sawi mauh mai, Zimbabwe hi Africa ah chuan renaissance hunlai rangkachak a an insumdawn tawnna hmun lûn tak a ni a. Lal Solomona pawh kha he hmunah hian a cheng ṭhin niin a ngai bawk ani. Tin, Africa a tuipui sen (Red Sea) Gulf of Aqaba hi Solomona lawng rual te ho chawlhna hmun ni a rin ani bawk a, chuta chuan khawi lam ah nge lawng ang kal tak ang tih hriat theih ani chuang lo, North Africa ami Tunisia te, America khawmualpui Peru ami Yucatan te, Asia ah India leh Sri Lanka te thlengin Ophir hmun awmna hi rinthu in sawi a ni a. Mahse a eng amah thudik tak ani tih nem nghehna leh hriat theihna hnu hma hmun tur tak tak a awm chuang lo.
Bible in a Ophir a sawi hi he khawvel ah hian ala awm angem? tih hi zawhna lian tak ani a, nge Atlantis ang hian tuifinriat mawng lamah a awm tawh zawk? Tichuan, OPHIR hi Bible thu inziak chhuichhuah theih loh tam tak zinga pakhat ani ta reng a ni.
No comments:
Post a Comment