Kum 1893 ani a, ni khat chu Williamsport, Pennsylvania a Methodist Sunday School zirtirtu pakhat James Milton Black-a nupui chuan, a pasal in an chenna in lam pan a lunghnur hmel. tak leh a rilru ah engemaw lungngaihna nasa tak nei hmel pu chunga rawn haw hnak² chu alo tlir reng a. An in gate a rawn thleng dawn a, a pasal mit a lungngaihna mittui in a chiah zawp nuai pawh chu engmah sawi lovin alo thlir reng mai ani. A pasal inchhung a rawn luh chuan, a piano dawhkan bul ah chuan a țhu nghal chawt a, a rilru ah engemaw ngaihtuah a nei tih chu hai rual ani lo. Tichuan ziahna pen a la a, lehkha phek ah chuan hle hla "When the Roll Is Called up Yonder” (Khita hming an lam hun chuan) tih hi a chhuak ta ani.
James Milton Black hi August 19, 1856 khan South Hill, New York ah alo piang a, Pathian rawngbawl na ngai pawimawh tak mi ani. Kum 1881 ah an chhungkua in Williamsport, Pennsylvania ah an pem a, hetah hian Methodist Episcopal church - ah Music instructor anih bakah hemi kohhran chhung a țhalai pawl ‘Young People’s Society’ ah President hna a chelh bawk. James M. Black chuan a rawngbawlna chu a ngai pawimawh em em a, Williamsport khua a tleirawl te chu Pathian lamah hruai tum in theihtawp a chhuah țhin a, mahse a țhahnem ngaihna chu a duh leh beisei angin a hlawhtling țhin loh avangin lunghnûr tak leh thaw pik tak a awm chang a ngah thei hle.
Ni khat chu, James Milton Black chuan a rilru ip-pik tak ti thawveng turin kawtthler fianrial lam pan in muangchang in a kal, chutia hmun rêh lai tak a kal tlang lai chuan hmelchhe tleirawl tê kum 14 mi vel hi, ama lam hawi zawng chuan muangchâng in a rawn kal phei ve bauh bauh a. Chu tleirawl chu a hmel en reng reng pawh a, chhungkaw rethei tak ami ani tih hriat tak, a sam thlur bem mai, a thawmhnaw lah bal leh pawr hrep hrup tak mai, a mit meng leh chetzia ah te chuan mahni inkiltawih leh hmel dâng lep mai hi ani. A hmel an en a, chulai khua ami ani tih a hrethei mai a, mahse Pathian erawh a hriat ngai pawh a ring hauh lo.
Chu tleirawl chaurau tak nen an inkal pelh dawn chuan James Milton Black chuan 'Mami, tunge i hming' tiin a han bia a, chu tleirawl te chuan chutia mi pangngai takin a be mai chu hrilhhai tak leh hlauhthawng deuh in a en ringawt mai a. Chutah James Milton Black chuan a vawi hnih nan 'Mami, tunge i hming le' tiin âw dam thlap hian an be nawn leh a chutah tleirawl te chuan 'Bessie ka ni e' tiin zawi sap hian a chhang a, “an maw, i hming a nalh hle mai” a han tih leh hnu phei chuan ngaihngam takin a chhawn ve thei ta.
James M. Black chuan Bessie chu an chhungkua dinhmun te an zawt chho va, Bessie chuan a pa chu zu ngawlvei, rui reng mai anih thu leh annu pawh hrisel lo leh a fanu ngaihsak ngai hauh lo anih thu chu a hrilh a. Tin, an reitheih em avangin eitur pawh midang ta a ruk sak țhin thu te nen lam chuan a hrilh ta vek a, James chuan Pathian chungchang te sawi pui in 'biak in' a inkhawm ve turin a sawm zui a, Bessie pawh chuan inkhawm pawh chu alo chak ve hle a, chumi hnu ațang chuan Sunday apiangin phûr takin Biak In lam chu a pan ve ta ziah a, Biak In hming lam na bu ah pawh 'BESSIE' hming chu a chuang ve ta kalh mai.
Pathianni țum khat chu, James M. Black chuan a tihdan pangngai in a zirlai naupang te hming chu a lam țan leh ta a, a tawp ah Bessie hming a han lam chu chhang tur a awm hauh lo mai a, a hawi kual a Bessie hmel reng reng hmuh tur a awm lo. James chuan “helai hming lam na ah pawh a awm lo chu, beram no lehkhabu ah chuan a awm ve êm ang chu maw?” tiin an sawi zui a, mahse inkhawm chhung zawng chuan Bessie-i, nidang a phur tak a, hminglam apiang awm țhin kha engvang a rawn inkhawm ta miah lo mai nge anih tih chuan a rilru a kam reng mai ani. Tichuan, Sunday School an bang hnu chuan khaw dang hawi lovin Bessie te in lam chu a pan ding nghal chat a, an inkawt a Bessie-i pa rui pai țung țung a kal pelh hnu chuan, Inchhung a khum ah Bessie-i pneumonia natna avanga nasa tak damlo mu bel chu a hmu a. Dim têin a biangah a chul a, “Bessie, inkhawm hming kan lamin i aw hriat tur a awm ta si lo a, i lo dam lo reng a ni maw” a han ti dam thlap a, Bessie chuan thei leh thei lovin James Black lam chu a rawn hawi a. 'Ka pu, he leia ka hming an lam hunah awm ve thei tawh dawn lo mah ila, KHITA HMING AN LAM HUN CHUANIN KA AWM ANG,' tiin a chhang a. Reilote hnu ah chuan 'khita hming an lam huna AWM' tawh turin a chatthla ta riai riai a. .
James Milton Black an chu hmeichhe naupang thusawi a hriat chuan, a thinglung chu a vaw kek hi ani ber a, a rilru a hneh êm avangin a mittui pawh dang zawh rual lovin a liam zung zung mai a ni. A chenna In ah a haw hnu chuan, a piano dawhkan a țhu chungin vanram ngaihna hla sak a han tum mahse sak tur a hre ta hauh lo mai, a rilru ah 'aw' engemaw hian 'Tinge nangman i phuah mai loh?' tiin a rawn zawt a, tichuan a rilru awm ang ang chu a ziak a, music play pah chuan a ziak zel a, a hnu zel ah pawh thumal engmah thlak danglam loh leh chhui țhat miah lovin kan Kristan Hla Bu - No. 239 na hi a rawn phuah chhuak ta a ni. “Khita Hming An Lam Hun Chuan Ka Awm Ang” Nang leh kei hi kan awm ve angem????
Lalpa tawtawrawt a rik hunin, hunbi a awm tawh lo’ng,
Kum khuain chiang takin khua a vâr tawh ang;
Lui râlah khian Leia mi chhandamte an awm khâwm hunin,
Khita hming an lam hunin ka awm phawt ang.
Khita hming an lam hun chuanin,
Khita hming an lam hun chuanin,
Khita hming an lam hun chuanin,
Khita hming an lam hun chuanin ka awm ang.
Chumi niah chuanin Isua hmingin mithi an tho ang,
Ama thawlehna ropuina an châng ang;
Vânah an awmnaah, ama mi thlan te an awm khâwm ang,
Khita hming an lam hunin ka awm phawt ang.
Zîng ata ni tlâk thlengin, kan Lalpa tân i thawk ang u,
A hmangaihna mak zawng zawng i hrilh ang u;
Tin, kan ni kan tum tawi zawh hunin, kan thawhrim zawh hunin,
Khita hming an lam hunin ka awm phawt ang.
(He hla letling tu hi Rev. David Evan Jones - Zosaphluia ani)
