SKILLET

                 

                  

                 Skillet hi rock music ngaithla ṭhin tam tak chuan kan hriat a rinawm a, an hla te pawh kan sak pui theih a tam ang, Skillet hi American Christian Rock band an ni a kum 1996 aṭanga rawn indin chho ani. Studio album paruk an release tawh a, album hi US ah ringawt pawh million hnih chuang an hralh tawh niin wikipedia chuan a tarlang, Christian Rock Band zingah chuan khawvel a hriathlawh leh lar ber te zing ami an ni. Tun a an band member hi mi pali (mipa 2, hmeichhia 2) niin  an vocal/bassist leh founder ni bawk John Cooper, a nupui zaithiam an rhythm leh keyboard ni bawk Korey, lead guitarist Seth Morrison, bakah an drummer leh vocal ni kawp Jen Ledger te anni a, an vai hian Christian ṭha tak vek an ni.

Tun ṭum hian an band history leh concert/tour chungchang lam aiin Christian an nihna leh an hla aṭanga Isua hnungzuitu an nihna te, ṭhalai te zingah nun beidawng leh chau te hneh a, an hla thu leh music te hmang a Pathian thuchah an puan dan te tlem a zawng tarlan ka tum dawn a ni.

                 He band dintu leh an zaitu pa ber John Cooper hi Christian chhungkaw pangngai tak aṭanga seilian ani a, kum 5 mi anih aṭangin Christian ah a inpe tawh a; nimahsela a Christian naupang  dang ang tho in a seilen hun tam zawk chu chhungte duhdan ang a ṭha ni a, a hriatna avanga chauh a Pathian bia ve mai ani a, piantharna tih ang tak tak hi ala nei pha bik lo.

A Nu chu christian ṭha tak ani a, amah kaihruaitu ber pawh ani; amaerawh chu High School a kal ṭan tirh hian a nu chuan cancer natna avangin a boral san hlauh a, a pa ho in he khawvel hrehawm tak hi a rawn hmachhawn ve ani. Kum 18 anih kum in worship service-a a inkhawm lai chuan Pathian thlarau pawl na a chang ta a, chuta ṭang chuan a nun chu thlak danglam niin, Pathian nen a inzawmna thuk tak a nei chho a hetih lai hian an pastor Rick Miller pawh in theihtawp in a kaihruai a, Pathian thu te hrilh in, amah influence tu ber pakhat ani. Tichuan, midangte hnen a Pathian thu puanchhuah duhna thinglung neiin hla thu ṭha tak tak te hmangin Rock music ngaisangtu ṭhalai te leh ring lo mite hneh ah Isua chanchinṭha a puang chhuak ta a ni.

                  John Cooper leh Korey te hi kum 1997 khan an innei a, fa pahnih Alexandria leh Xavier te an nei tawh a, music band khat a awm nupa tlem te zing ami an ni. Milar tam tak in an tlin loh nupa ni chunga band concert leh tour te an kalpui reng thei a, an fate pahnih pawh an tour na ah hian an hruai ve fo ṭhin bawk. Korey hi guitar leh keyboard thiam tak ani bakah a zaithiam in a zai ve fo bawk ṭhin. Tin, rockstar anih ang takin tatoo a nei nual a, mizo te chu ni se nutling tatoo nei chu hmeichhe nasa tak tur ah kan ngai ngawt maithei mahse a fate tan nu ṭha tak ani a an chhungkaw khaidingtu pawimawh a ni a, heibak ah an nupa hian inneih zungbun aiah an kut zungṭang ah tatoo an chhu hlauh thung a. An ni chuan ringtu nun chu pawnlam landan aiin chhungril an ngai pawimawh zawk tih a lang reng mai.

Hemi chungchang hian Cooper chuan (2010 Cteation festival) YLO interview a neihna ah “sakhaw mi tak chhungkua aṭanga seilian ka ni a, kawr dum lam hak te, sam zuah, guitar leh drums lam reng reng te kha ka khawih leh tih ve min phalsak ngai lova, mahse Bible ka chhiar a, chutiang chu Bible nen a inremlohna ka hmu hran lo. Lal Isua tan ka nung a, mi zawng zawng duh dan in  ka nung thei lo” tiin a ngaihdan a sawi.

                      

                 Skillet hla tam zawk hi Pathian rinna thu te, fuihna te, ṭhalai nun beidawng mahni intihhlum hial duh khawp a rilru beidawng, depression in a tlakbuak tamtak te tan thuchah leh Pathian pan tur a sawmna thu te ani hlawm a. A hla avang hian concert ṭhenkhat ah Pathian thlarau awmpui chang thar an fans te zingah tam tak an awm a, ṭap chung a inhmuchhuak ta te sawi tur tam tak an awm bawk. Vocalist John Cooper chuan a nunna thil hlimawm ber chu “show kan neih lai a an fans ten an nun Pathian tan an hlan lai  hmuh tluk a thil hlimawm a awm lo” tiin a sawi hial ani. Tin, thuhriltu lar Billy Graham a fapa Franklin Graham pawhin an concert hi a ṭawiawm ve ṭhin a, concert entu mipui te hma ah sermon te leh ringtu ni tura sawmna thusawina hun te a nei ve bawk ṭhin.

Skillet hla zinga pakhat “The Last Nght” tih chu ‘hmeichhe tleirawl a nun a thil hrehawm tinreng a paltlang lai, nun hlutna reng reng nei tawh lo, a nu leh pa te pawhin an chhungkaw a thil ṭha lo tinreng lo thleng apiang chu amahvanga an puh leh an endawng tawh ani. A nun chu huatna in a khat a, a naupang têt aṭanga chutiang reng reng a nun hmang anih avangin hrethiam tu leh ngaihsak tu a tawng lova, alo paing chhuak ve te chu thil tihsual pakhat mai niin a ngai ani, mahni a inti nâ a, a banrêk chu vawi tam tak rukin a zai ṭhin avangin sêr thluah tawh ani. Chutiang reng reng nun ai chuan tiin mahni intihhlum a tum ta a, a ṭhiante leh chhungte zawng zawng chu mangṭha a tum lai chuan Cooper hi hmu a, ani chuan “a nun chu thil tihsual palh anih loh thu leh dam chhan ṭha tak ala neih thu te. Pathian amah hmangaih em em tu a awm a, ani chu vawikhat chauh tal chance a pe anih chuan chumi zan aṭang chuan mal takin hun a hman tawh ngai dawn loh tur thu” hla hmangin a hrilhna a ni.

"The Last Night"

You come to me with scars on your wrist
You tell me this will be the last night
Feeling like this

I just came to say goodbye
Didn't want you to see me cry
I'm fine but I know it's a lie

This is the last night you'll spend alone
Look me in the eyes so I know you know
I'm everywhere you want me to be

The last night you'll spend alone
I'll wrap you in my arms and I won't let go
I'm everything you need me to be

John Cooper chuan an concert zawh a, a thil tawn pakhat tihian a sawi bawk a, “ka concert zawh chuan fans te autograph min ziah tir tura rawn inline zingah chuan pa pakhat sang ṭha zet ft-6’3 vel bawr, hmel bumro zet mai a hnar ah te chuan hnarbeh a beh khat vek a, ka mihring hmuh tawh ah chuan a hlauhawm ber hial ang. Min khawih nat tum a rawn kal ah ka ngai a, ramhnuai zawl ani hial in ka ring, kut min thlak nghak tawp chungin a bulah chuan ka ding a. Nimahse; ka rin loh takin kan hla khan a rilru a hneh thu min hrilh ta hlauh thung a, “eng band nge in nih ka hre lova Flyleaf (kan concert pui te) te en tur a rawn kal kan ni a, mi tinreng mai hian min hua a, keimah pawh ka in haw hial tawh ka awmdan hi ka hrethiam lo takzet a ni” tiin in min hrilh a, keichuan a ṭha e, ka lo ṭawngṭai sak dawn che mi? tiin ka sawm a, anni chuan “ka damchhung hian tuman min lo ṭawngṭai sak ngai lova, engthil nge a nih pawh ka la hre lo” tiin min hrilh a keichuan ka awi lo hle thung. Tichuan chuan ka ṭawngṭai sak ta a, khapa hmel ah khan hlauhna tam tak a awm a, a zam takzet ani. A kut lian hrawl zet chu ka dar ah a rawn nghat a, a mittui hru a chulai club leh biker mi tawrawt tam tak te hma ah chuan Thlarau Thianghlim a rawn thleng ani. Hetiang hi vawi tam tak ka tawng tawh ṭhin” tiin a sawi.

Skillet hi Rock Music Industry ah a mikhual tawh lo hle a, Christian rock zinga Mainstream Rock Songs chart a top hauh thei hmasa ber an ni a. Heti chung hian Cooper chuan “chapo thei kan ni lova, thil tihsual tam tak kan nei, Pathian in min zirtir zel a, tun aia ṭha zawk pawhin min la siam thei a ni” a ti a.

Cooper chuan “Rock mainstream ah chuan sex, drugs, rock and roll te saruak a lam te hi thil inkawp tlatin an ngai ṭhin, ka inchhuanna chu Skillet hian Christian band kan nihna hi kan zahpui ngai lova, vawikhat mah 'Christian band kan nilo tiin mawilo takin kan che ngai lo' chutiang chuan lo ti ve ta ila, miten min dem anga, chutiang chuan kan nihna zahpui turin min siam an tum ṭhin. Chutianga min nawrtute chu an mit ah en in ‘Christian band kan ni a, chu chu kan zahpui lo ang’ tiin ka sawi a. Stage a ka din hian Pathianin indonaa sipai angin min hmang a, sports na a infuihphur nan an au rual ṭhin ang hian ṭawngṭaina in kan infuih a, a chhan chu Pathian in min hmang dawn a ni”.

“Khawvel a rock band lar ber ber te Black Sabbath, Iron Maiden, Slipknot, Linkin Park etc te zingah SKILLET hian Gospel hming pu chungin Rock Music khawvel ah kan hming kan chher thei a, concert leh tour lian tham tak tak pawh kan kalpui ve thei. Skillet hian vawikhat mah Gospel nih hi kan zahpui ngai lova, interview na pawh huai takin kan sawi lang ṭhin” tiin a sawi bawk.

Tun atan chuan duhtawk phawt ila, remchang ah an hla thenkhat a hla piah lam a story awm te ka rawn tarlang leh dawn nia.