GABRIEL JESUS LEH JERSEY NO. 33

He thu hi Manchester City fans Mizo Facebook Group a Sunday pual bik atan ka post ani a, blog lamah edit lem lovin a ngai ngai in ka suan tawp a, chhiardan kan thiam nan thu hma angin kan tarlang lawk ani e.

Palmeiras ațanga Man City a rawn luh tirh khan a jersey number atan 33 a rawn thlang a, hei hi City a rawn luh hma pawn a hak tawh sa kha ni. Engvangin nge he Jersey No kher hi a thlan ka hre lo maithei?

             The Sun chanchinbu in a kawmna ah Jesus chuan "Ka nunah hian idol pahnih ka nei a, pakhat chu Pathian ania adang leh chu ka nu ani. Pathian ah hian rinna ka nghat nasa em em a, a tel lo chuang engmah lo mai ka ni. Jersey No.33 hi Isua'n khawvel a rawn kal a, kan tan kross-a an khengbehna laia a kum zat ani a, amah ka rinzia tarlang nan a ka thlan ani. Professional football ka khelh tirh ațangin he number hi ka ha tawh a, ka number ngainat ani a, kum tam tak hnu ah pawh ha zel ang. Isua hming ang ka put ve avang hian ka inchhuang a, amah ringtu ka ni hi ka lawm bawk ani” tiin a sawi.

Kristian nunah hian ringtute chu Pathian nen inzawmna țha kan neih angai a, hei hi Kristian nun bul ințanna pakhat ani. Bible ah Johana 15:4 ah chuan Lal Isua'n "Keimahah awm reng rawh u, kei pawh nangmahniah ka awm reng ang. Peng chu grep hruia a awm reng loh chuan amahin a rah thei lo ang bawkin, nangni pawh keimahah in awm reng loh chuan in rah thei lo vang" tiin min hrilh a, Isua nen a inlaichinna țha neih hi kan nun in rah țha a chhuahna kailawn ani a. Grep hrui peng te chu grep hruiah an awm tlat chuan rah an chhuah țhin ang hian, miin Isua Krista a vawn tlat chuan rah duhawm a chhuah mai dawn ani.

Amaherawh chu, Pathian nen a inlaichinna nun chu vawi lehkhata famkim leh Lal Isua anga fel leh thianghlim famkim a ni lo va, ni tin chhawm nun ngai a ni (Philippi 3: 12-14). Isua nen inzawmna țha kan neih dawn a thil pawimawh hmasa ber pakhat chu “kan nunah Pathian dah pawimawh hmasak ber hi ani”.
Mi tam tak hi chuan kan nunah Pathian aia ngaih pawimawh kan nei ngei ang, kan phone/Internet leh social media, kan bialnu/bialpa, kan zirna leh eizawnna, etc.. nikhat a darkar 24 chhung hian engtia rei nge Pathian tan kan hun pek țhin ang le? Pathian hnaihna țha ber pakhat chu "Atan a kan hun kan pek hi ani"......

Matthaia 22:36 ah khan thupek ropui ber chu engnge ni tiin mi pakhatin Lal Isua a zawt a.“Lalpa, i Pathian chu i thinlung zawng zawngin, i thlarau zawng zawngin i rilru zawng zawngin i hmangaih tur a ni,” tiin a chhang a. Hemi tuma Isua sawi tum ber hi engkima Pathian dah hmasak ber thu tho hi a ni. Keimahniah Pathian hian inpuanchhuah duh thin mahse, Amah hi kan hlat thin a, hun kan pe thei lo thin a, thildang kan dah pawimawh hmasak leh țhin vang ani. Pathian hi kan duh ang zat in kan hnaih thei a, atan a hun kan pek phal danah a innghat.

Man City player tho Fernandinho hian Shakhtar tan a khelh lai khan interview aneih țumin, reporter pakhat chuan 'I nunah enge pawimawh ber?' tia a zawh chuan "Isua Krista" tiin awlsam takin a chhang a, player țhenkhat chuan an professional line football leh an career emaw an tan mi pawimawh nu leh pa, unau te țhiante an sawi fo țhin. Bible chuan "A ram leh a felna chu zawng hmasa zawk rawh u, tichuan chung zawng zawng chu a pek belhchhah dawn che u nia" (Mathaia 6:33) tiin min hrilh a, Pathian hi engkim neitu leh siamtu anih vangin amah kan dah pawimawh hian tuar leh chânna te pawh kan tawk fo țhin ang mahse chung zawng zawng chu pek belhchhah min tiam a, malsawmna chhiar sen loh vin min vur dawn ani.

A tawp ber na atan chuan 'Pathian hi thikthu chhia a ni a, amah i ngaihsakna leh ngaih pawimawhna kha a duh ber. Thildang aia amah ngaihsak ber tur leh i ngaihtuahna leh hun zawng zawng ama tana hmang turin a duh che a, a sawm reng che a ni'.

Lalpa ropui ber rawhse, AMEN!!