HE LEADETH ME (KAN PATHIANIN MIN HRUAI ZEL ṬHIN)

          Kum  1862, March 26 America tualchhung indo (Civil War) thlen hunlai a ni a, America ram pumpui chu indo thuthang leh râlkhel reng reng a hun an hman lai a ni. Tlai khat chu Philadelphia khua a First Baptist Kohhran ah chuan Pastor a hming Joseph H. Gilmore chuan Pathian Thu a sawi a. Bible chang Sam 23 hmangin, Pathian kaihhruaina ropui zia leh thlamuan thlak zia te, mipui te chu indona thu ringawta inti thlabar lova Lal Isua chauh en zawk tur in a fuih nasa hle a.

A tuk inkhawm bân ah chuan, Pastor Joseph H. Gilmore chu Upa Watson-a te in ah lengkawi in, a sermon thu bawk chuan an titi zui a. Pathian hruaina ropui zia chuan a rilru a hneh tâk em avangin chuan lehkhapuan la in, he hla hi a rawn ziak chhuak ta a ni.

        He hla hi tun hma zawng kha chuan kan hla thiam lar anih vang nge, a hla thu leh a behchhan Bible chang ngaihtuah lem lo hian ka lo sa liam ve deuh mai mai zel a. Mahse, ngun zawk a ngaihtuah chung leh hun harsa leh kan dinhmun a zirin hla ṭha leh ropui tâk a ni tih ka hre chiang ta uar uar mai. A hla hrim hrim hi a nalh ka tih bakah ka zin chhuah ve chang a, motor emaw thlawhna a ka chuan ve chang te a, earphone ka pai anih chuan ka ngaithla deuh ngei ngei ṭhin a. Rinna lam a ka pachhiat ve viau avang hian motor chuan a accident palh leh chetsual palh hi ka hlauh ṭhin hle a, thih thlamuanna la nei chiah lo mahila, zin thlamuanna tal ka neih phah ve niin ka hre ṭhin.

              KAN PATHIANIN MIN HRUAI ZEL THIN,
             CHU CHU HRIAIN KA LAWM EM EM;
             KA THILTIH ZAWNG KA TIH APIANG,
            AMA KUTIN MIN HRUAI ZEL THIN.

He hla châng khatna ah hian, Pathian vênna leh kaihhruaina kan dawn avangin hian lawm tur kan nih zia a tarlang chiang hle a. Ringtu nûn ah hian chauh chang te, rô leh hul chang te, sual a tluk leh chang te hi vawi tam tak kan nei ṭhin. Piangthar tawh kan ni emaw pawh nise la, sual in nitin min thlem a, kan zawh loh tur kawng kan lo zawh leh fo ṭhin te, Pathian lam reng ngaihtuah lek lova kan bul vêl thil awm ringawt kan ngaihtuah chang te a awm fo ṭhin a. Chung thil kan tih tawh leh kan tih apiang ah pawh chuan Pathian hian min veng reng thin a, hun ṭha leh hun lawmawm atan a inlamletna hun ṭha min la pek fo avang hian lawm tur kan ni.

             A CHANG CHANGIN KA LUNGNGAIIN,
             A CHANG CHANGIN KA LO LAWM THIN;
            HLAUHAWMAH LEH HLAUHAWM LOVAH,
            AMA KUTIN MIN HRUAI ZEL THIN.

A changin Ni a sâ a, a changin khua a dur in ruahpui nasa tak a sur ṭhin ang hian, Mihring te nun ah pawh hian lungngaih leh lawmna hun hi a indawt zut reng a, hun hlimawm tak kan tawng a, a hnu lawk ah lungngaihna nasa tak ten mi tlak buak leh a. Damloh na leh thih nan hial ten kan chungah thla an zar hun a awm a; khuarêl chhiatna avang te, accident leh chetsual na avang te in hlauhna min chim buai chang a awm fo a, chung zawng zawng ah pawh chuan Lal Isua in min hruai zel ṭhin tih hi ringtu te chuan kan innghahna leh kan thlamuanna engkim zawng aia kan nun hahdam na chu a ni.

            THIL ENG PAWH KA CHUNGAH THLENG SE,
            LUNGNGAI LOVIN KA LO LAWM ANG;
            HUAI TAK PAWHIN KA AWM RENG ANG,
            AMA KUTIN MIN HRUAI ZEL THIN.

He châng hi a tâk a nunpui theih ka chak fo ṭhin a ni. Thil engpawh kan chungah lo thleng se, lungngai lova lawm zel theihna thinlung pû tur hian mihring rilru aṭang hi chuan a harsa hle mai. Vanduai bik riau a inhriat chang te, kan hun kal tawh a duhthlanna dik lo kan siam avanga kan tawrh lêt chang te, midangte aia chak loh bik riau a kan inhriat chang te hian Pathianin ka chung a ro a rel dan ah hian vûi mai ava awl ṭhin em!. Thihna hial kan chungah alo thlen chang te hian, huai tak a awm reng ava har êm. Kan hmangaih te mualliam tur thlir chu, rilru hian a pawm thei lova, vuina tur kan ngaihtuah a Pathian dêm mai pawh a awl rum rum ṭhin a ni. Nimahsela, Pathian hian a kut chak in min hruai reng a, chu chu a hrechiang apiang in amah ah lawmna an hmu a, nun hahchawlhna an lo nei zawk ṭhin a lo ni.

              KHAWVELA THIL KA TIH ZAWHIN,
              KA SUALTE PAWH NGAIHDAM NIIN;
              KA THIH DAWNIN KA HLAU LO VANG,
              AMA KUTIN MIN HRUAI ZEL THIN.

Nakinah chuan, he khawvel kan zinkawng tawp kan zawh hun a lo la thleng ang a. Keimahni avangin khawtlang information ah "chhiat tawh thu" anla puang ve ang. YMA nula leh tlangval ten kan In leh lo min senghawi sak a, keimahni avangin an tlaivar hun ala thleng ve ang a, kan kuang chungah kan damlai a kan thil tih ṭhat te anla rawn sawi ve ang a. Chutiang in thihna thlân thim a min zalh hun ala thleng ve ang, chung hun ah chuan ah pawh chuan Lal Isuan min hruaina avangin thlamuang taka chatuan hmun kan pan theihna turin, A kut chak a innghat ngam a, kan sualna zawng zawng te ngaihdam kan nih theih nan, kan damchhung ni reilote ah hian zawi tê tê a kal ava pawimawh em!!!

              MIN HRUAI ZEL THIN, MIN HRUAI ZEL THIN,
              AMA KUTIN MIN HRUAI ZEL THIN;
              A ZUITU FEL TAK NIH KA DUH,
             AMA KUTIN MIN HRUAI ZEL THIN.