PATHIAN HNAIH

                               "Pathian hnaih rawh u, tichuan anin a hnaih ang che u." - Jakoba 4:8

Jakoba 4:8-a “Pathian hnaih” tih hi Hebrai tawng chuan “qirabat Elohim” tih a ni a. Chumi awmzia chu “Pathian pan” emaw “hmachhawn” emaw tihna a ni. Elohim tih hi Hebrai Bible-ah chuan “Israel te Pathian” sawi nana hman a ni. Qirabat tih hi Pathian hnena intukluhna, rinna nena Pathian tanpuina beisei a, Amah va pan, hnaih/hmachhawn tih a kawk thung.

• Jakoba 4:8 ah khian "Pathian hnaih rawh u, tichuan anin a hnaih ang che u." tih kan hmu a, Pathian hian amah hnaih turin min duh a. Ringtu kan nih chuan kan tih makmawh a ni. Thuthlung Thar Bible ah hian Pathian'in amah pantu te a hnar ngai lo tih kan hmu a, tupawh amah pantu te chu damlo, mitdel, keibai, ramhuai zawl, thi put te pawh damna a thlen sak thin a, mithi te hial pawh a kai tho anih kha. Amah hnaitu apiang beidawngin a awm tir ngai lova, malsawmna leh tisa leh thlarau damna a pe zawk țhin. Chuti anih si chuan, keini rinna kawng a chak lo tak tak, he khawvel a harsatna tinreng in a min chimbuai mek lai hian Pathian hnaih hi kan mamawh ngawi ngawih a ni.

• Sâm 145:18,19 ah chuan “LALPA chuan a kotu zawng zawngte chu a hnaih thin a. Tih tak zeta amah kotu zawng zawngte chu. Amah tih tute duh chu a hlawhtlintir ang a; an au thawm a hria ang a, anni chu a chhandam ang,” tiin a sawi a, Pathian hnaih kan duh chuan 'tihtak zet a, amah kan koh' a țul. Mahse, kan duhthlanna ah a innghat thung. Pathian hian amah hnaih turin mihringte hi duhthlan theihna chanvo min pe a, chuvangin amah kan duh tak tak anih chuan thil dang aiin kan dah hmasa tur a ni.

Engvangin nge Pathian kan hnaih ang?

• Pathian kan hnaih nachhan tur pakhat chu 'thlamuanna' ani. Khawvel ah hi chuan ralmuan loh na, khuarel chhiatna leh mihring sualna avanga indona te hi engtik lai pawhin kan chung a thleng thei reng ani a, Pathian hnaih rengtu tan erawh chuan khawvel ah hian hlauh tur reng reng a awm lo. Thihna hial pawh in a ngam loh Pathian kan neih avangin 'thlamuanna' kan nei reng dawn a ni.

• Pathian in min hnaih dawn ani. ("Pathian hnaih rawh u, tichuan anin a hnaih ang che u") Pathian in min hnaih dawn chuan keimahnin kan hnaih hmasak phawt angai. Tunlai țhlalai tam tak in khawvel hlimna kan chen a, khawvel changkangna in min chim tawh a. Pathian tan a mahni hûn leh thâ kan sêng hmang tawh lo, ruihhlo leh mipat hmeichhiatna hmang sual kher lo pawh hian Pathian hi kan hlat thei hle tih kan hriat a țul. 'Inkungkaihna hi inbe ngai reng reng lo tan chuan, a nghêt tak tak thei lo ang' hian Pathian biak nachang te, a thu chhiar nachang kan hriat si lova Smartphone leh Internet/social media ringawt a kan buai hian kan rin aiin Pathian hi kan lo hlat tawh țhin. Chuvangin, keinin kan hnaih ve phawt te, Amah kan pan ve phawt te hi, Pathian in min hnaihna anih tlat avangin duhthlanna dik kan siam a ngai a ni.

• Pathian hi tlanbo san theih loh anih avangin kan hnaih tur ani. Thuthlung hlui ah Jona hneh ah Ninevi khua a, A thu tlangaupui turin Pathian in a ko a mahse Tarsis pan tur lawng ah a chuang ta daih zawk anih kha. Tuifinriat thleng a Pathian in a umzui dan chanchin pawh ka hre tawh vek awm e, Jona ang hian Pathian hi han tlanbosan pawh tum viau mahila min siamtu leh engkim a min neitu, engkim ti thei anih miau avangin kan duh emaw duh lo emaw kan tlanbosan thei chuang lova; chuvangin Amah kan pan mai hi kan tih tur a ni.

Engtin nge Pathian kan hnaih ang?

• Pathian kan hnaih dan chu Bible chhiar leh Țawngțai ani. Pathian in Bible min pek chhan hi Ama inpuanna thu nûng a ni a, hemi kaltlang hian Pathian thu kan hre thei. Thlarau lam ah hlim sâng viau kan ni lova, "Pathian in chu thu chu ka rilru ah min rawn pe" tih tur angchi kan nei pha lo anih pawhin, Bible kaltlang hian direct in A thu tam tak kan dawng thei a, Bible hi lehkhabu dahna bawm a rem țhat mai tur te, kan mutna lukham bul a dah mai mai tur a Pathian in min pek anih loh avangin kan chhiarin, kan zir ve fo tur a ni. Țawngțaina nen tih takzet leh rilru zawng zawng a kan inpek chuan kan thlarau nun pawhin hma a sawn ngei ngei ang tih kan rin a, chutiang a țawngțai leh bible chhiar hun kan insiam a, Sunday chauh nilo keimahni a fianrial hun kan hman ah te hian tih țhan ah neih kan tum fo tur a ni.

• Inkhawm leh a thu ngaihthlak. 
Kristian kan nih chuan Pathian biak inkhawm kan ngai pawimawh tur a ni. A mite te inpawlhona ah Pathian a âwm tlat avangin amah kan hnaih na pakhat ani. Tin, Pathian thu sermon te hi kan ngaihthlak fova, kan nun ah sengluh kan tum tur a ni. Mizo Kristian te hian speaker, pastor, Upa te ațangin sermon thu țha tak tak kan dawng reng a, mahse zawm tum leh ngaihtuah zui peih hi kan tam lo țhin. "A thusawi chu a țha hle mai" tih ringawt ah kan tawpsan a, Biakin gate kan chhuah pui lo fo țhin. Smartphone kan nei vek a, hemi hmang hian kan phone ah Bible Application leh YouTube lamah te sermon video hrang hrang en tur a awm bawk a, heng kan phone hmang te hian Pathian ah kan rinna ti chak thei tur zawng a kan hman thiam pawh a țul hle a ni.

Kan nitin nunah hian Pathian kan beisei tur a ni a. Khawvel thim zinga kan pil bo loh nan kan nitin nunah Pathian kan hnaih deuh deuh tur a ni. Pathian hnaih hi a hlawkthlaka; thlamuanna te, chhandamna te, hlimna te, chatuan nunna leh lallukhum te kan ta a ni dawn si a. Sam ziaktu pawhin, “Kei atan erawh zawng Pathian hnaih hi a tha a ni: Lalpa PATHIAN chu ka inhumhimnaah ka hmang a, I hnathawh zawng zawng thu chu ka hrilh theih nan” (Sam 73:28) a tih kha.

Pathian hian Amah hnaih turin duhthlanna min pe a, chu chanvo chu hlen ngei turin kan taksa, rilru leh thinlung Ama lamah hawng ila; tawngtai, inkhawm leh Amah fak chung zelin kan Pathian hi i hnaih ang u.